Visita guiada por Annie Leibovitz á exposición Wonderland para estudantes de Galicia

O vindeiro 23 de abril ás 16:00 h, a fotógrafa Annie Leibovitz realizará un percorrido guiado pola súa exposición Wonderland en exclusiva para 30 estudantes galegos.

Esta actividade está dirixida a estudantes actualmente matriculados en centros educativos dependentes da Consellería de Educación, Ciencia, Universidades e Formación Profesional que cursan o ciclo formativo de grao superior correspondente ao título de técnico superior de Artes Plásticas e Deseño en Fotografía ou o ciclo formativo de grao superior correspondente ao título de técnico superior en Iluminación, Captación e Tratamento de Imaxe. Trátase da mesma comunidade educativa coa que a Fundación MOP colabora no programa Future Stories desde 2022.

A asistencia á visita require solicitar con antelación unha das 30 prazas a través da páxina web da Fundación MOP a partir do luns 20 ás 16:00 h. Xunto coa solicitude, será preciso achegar o certificado de matrícula nalgunha das dúas titulacións indicadas.

As prazas asignaranse por orde de recepción de solicitudes. Establecerase un sistema de lista de espera para reasignar as posibles cancelacións ou solicitudes que non cumpran cos requisitos.