A Fundación Marta Ortega Pérez (Fundación MOP) foi constituída no ano 2022. O seu proxecto, que xira ao redor da celebración de exposicións de primeira orde, estrutúrase sobre tres piares: A Coruña, a fotografía e a moda

A Fundación leva a cabo a súa actividade no Centro MOP, un antigo espazo industrial recuperado pola arquitecta Elsa Urquijo, situado no Peirao de Batería da zona portuaria da Coruña. Ademais de exposicións de fotografía dedicadas a grandes mestres, a Fundación MOP fomenta outras actividades culturais e conta cunha libraría especializada de seu.

A entrada ás exposicións da Fundación MOP é de balde. As ganancias obtidas da venda de merchandaxe das exposicións permitiron a creación do programa Future Stories, orientado ao apoio de creadores novos que se atopen nos comezos da súa carreira artística. Ademais, con cada exposición, a Fundación impulsa un programa educativo conducido por artistas locais que pretende levar ás aulas galegas a figura de grandes fotógrafos e fomentar deste xeito un coñecemento profundo da súa obra.