Paolo Roversi Doubts

A Fundación MOP acolleu Doubts de Paolo Roversi, unha gran exposición que reuniu obras icónicas con imaxes até o momento inéditas para presentar un percorrido íntimo polo universo artístico de Roversi e celebrar a súa decisiva pegada na linguaxe da fotografía de moda.

Ao longo da súa traxectoria artística de máis de catro décadas, Paolo Roversi construíu unha linguaxe fotográfica absolutamente propia. É capaz de insuflar vida ás súas imaxes dun xeito que roza o desconcertante. Como sinala o crítico Vince Aletti, moitas das mellores fotografías de Roversi «parecen cobrar vida ante a nosa mirada... as súas imaxes emocionan ata o punto de que resulta imposible confinalas a unha páxina, a unha parede».

Doubts é o título que Roversi escolleu para a súa exposición no Centro MOP. E é que, para el, as dúbidas «abren a porta á creatividade e á imaxinación, do mesmo xeito que as certezas a pechan». En Doubts atopáronse moitos dos elementos que mellor definen o seu xeito de traballar, incluída a súa profunda fascinación polas posibilidades experimentais que ofrece a Polaroid. Roversi transformou con Doubts a nave do Centro MOP nunha rede de seccións interconectadas, cada unha das cales expresaba unha faceta diferente da súa estética: Theatre, Appearances, Shadows, Doubts, People, Presence, Grace, Beauty e Fading. En conxunto, estas seccións daban conta da extraordinaria magnitude da mestría técnica de Roversi, da peculiaridade da súa visión e dunha convicción case relixiosa de que a beleza se atopa no silencio, nas sombras e no baleiro que se dá entre as cousas.