Future Stories

A Fundación MOP naceu en 2022 con dúas prioridades: expoñer regularmente en Galicia a obra dos fotógrafos de moda máis importantes do mundo e dotar esta actividade dunha vertente educativa que servise de apoio e inspiración ás futuras xeracións de artistas galegos. Dentro desta faceta, Future Stories é o proxecto co que cada ano acompañamos nos seus primeiros pasos na fotografía profesional unha selección de estudantado que se acaba de titular: primeiro, ofrecéndolles, en colaboración coa prestixiosa Fondazione Sozzani, unha formación do máis alto nivel en fotografía de moda; despois, levando a súa obra ao mesmo espazo no que o público puido desfrutar anteriormente de Peter Lindbergh, Steven Meisel e Helmut Newton, o Centro MOP no Muelle de Batería da Coruña.

Durante os seus tres meses de estadía na sede de Milán da Fondazione Sozzani, Umesh Graña, Alba Jiménez e Sofía Taboada recibiron os coñecementos e as ferramentas precisas para seren quen de explotar o seu talento como fotógrafos e crear tres proxectos persoais únicos. Agora presentámolos na exposición Future Stories (13 de xuño–31 de xullo de 2024) e mais neste catálogo. Estou certa de que este é só o primeiro soño cumprido da longa carreira creativa que teñen por diante.

Despois de anos vivindo no mundo da moda e a fotografía, é un privilexio poder compartir coñecementos cunha nova xeración de talentos. Durante este programa conxunto de The MOP Foundation e Fondazione Sozzani, Alba Jiménez, Sofía Taboada e Umesh Graña desenvolveron o dominio da linguaxe visual e perfeccionaron o seu propio estilo mediante a concepción e creación dun proxecto impreso único.

O libro de Jiménez Glossy stems from an innate need for water é unha reflexión que nace da súa paixón por comprender o misterio da luz a partir do estudo da auga. O concepto e experimentación de Taboada levan o seu traballo máis aló da práctica técnica e teórica para acadar un impacto emocional que queda reflectido na súa publicación It’s quite a starry place. O libro Mixed feelings de Umesh é o resultado da súa dedicación e inmersión no mundo da fotografía (dende a súa historia até a súa técnica e concepto), así como da súa constante investigación.

Chegar a entender en que consiste dominar todas as facetas da arte da fotografía permitiulle a cada un deles encaixar o seu punto de vista propio e único nestes proxectos. A creación dunha obra empregando estas técnicas que veñen de adquirir potenciará o seu desexo de seguiren avanzando coas súas visións persoais no futuro.

A colaboración entre a Consellería de Educación, Ciencia, Universidades e Formación Profesional e a Fundación MOP supón unha oportunidade única para o alumnado que cursa o ciclo superior de Fotografía nas catro Escolas de Arte e Superiores de Deseño de Galicia.

Esta primeira edición do catálogo Future Stories, preséntase como unha lanzadeira do traballo realizado por Umesh Graña, Alba Jiménez e Sofía Taboada, estudantes das Escolas de Arte e Superiores de Deseño de Galicia, que, grazas a esta colaboración, dan o seu primeiro paso como profesionais da fotografía de moda.

Agardamos que sexa o comezo dunha gran carreira artística chea de éxitos.