DAVID CHIPPERFIELD

David Chipperfield estudou arquitectura na Kingston School of Art e na Architectural Association School of Architecture de Londres antes de fundar o seu propio estudo en 1985. Creou unha metodoloxía de deseño que agora se utiliza en cinco oficinas en Londres, Berlín, Milán, Shanghai e Santiago de Compostela.

David Chipperfield é membro do Royal Institute of British Architects e membro honorario do American Institute of Architects e do Bund Deutscher Architekten. Entre os recoñecementos que recibiu atópanse a Orde do Mérito da República Federal de Alemaña, concedida en 2009, e o título de cabaleiro polos servizos prestados á arquitectura no Reino Unido e Alemaña, concedido en 2010. En 2011 recibiu a Real Medalla de Ouro de Arquitectura do RIBA, e en 2013, o Praemium Imperiale da Asociación de Arte de Xapón, ambos os dous concedidos en recoñecemento ao labor a toda a súa carreira. David Chipperfield foi nomeado membro da Order of the Companions of Honour do Reino Unido en 2021, Comendador da Orde de Isabel a Católica de España e membro da Orde Pour le Mérite für Wissenschaften und Künste de Alemaña en 2022 polos seus servizos á arquitectura a nivel internacional. En 2023 foi galardoado co Premio Pritzker de Arquitectura.

Ademais do seu traballo de deseño, David Chipperfield deu clases e conferencias en escolas de arquitectura de todo o mundo. En 2012 comisariou a 13ª Exposición Internacional de Arquitectura da Bienal de Venecia baixo o título Common Ground. Foi o mentor de arquitectura entre 2016 e 17 para a iniciativa Rolex Mentor and Protégé Arts. En 2017 fundou a Fundación RIA, unha entidade privada sen ánimo de lucro que traballa por un desenvolvemento económico, ambiental e cultural significativo en Galicia, España.

David Chipperfield publicou numerosos libros e artigos, entre eles On Planning – A Thought Experiment (2018), unha publicación que explora e teoriza as calidades urbanas dos desenvolvementos urbanos contemporáneos. Foi o editor convidado en 2020 da revista de deseño italiana Domus.