Nick Knight

Nick Knight é un dos creadores de imaxes máis influentes e visionarios do mundo e o fundador e director da aclamada páxina web dedicada ao fashion-film SHOWstudio.com.

Desafía constantemente as nocións convencionais da beleza e é coñecido polas súas innovadoras colaboracións creativas con deseñadores principais como Yohji Yamamoto, John Galliano ou Alexander McQueen, entre outros.

Knight produciu campañas publicitarias para clientes como Burberry, Chanel, Fendi, Christian Dior, Lancôme, Swarovski, Tom Ford, Calvin Klein e Yves Saint Laurent. Mantén relacións creativas de longo prazo con numerosos artistas musicais, producindo vídeos galardoados para Björk, Lady Gaga e Kanye West.

O seu primeiro libro de fotografías, Skinheads, foi publicado en 1982, gañando un premio DandAD en 1996. Desde entón produciu unha retrospectiva de doce anos titulada Nicknight, Flora, unha serie de plantas e flores prensadas do Natural History Museum de Londres, e Nick Knight, Unha monografía retrospectiva publicada por Harper Collins en 2009.

O seu traballo foi exposto en todo o mundo en diferentes institucións de prestixio, incluíndo Tate Modern, Victoria & Albert Museum, Saatchi Gallery, National Portrait Gallery, MoMA, Gagosian Gallery e Albion Barn. En 1993, Knight produciu unha instalación permanente, Plant Power, para o Natural History Museum de Londres, que se puido visitar durante 15 anos.

Nick Knight lanzou SHOWstudio no ano 2000, co obxectivo, en palabras textuais de Knight, “de mostrar todo o proceso creativo, desde a concepción ata a materialización”. Desde os seus inicios, SHOWstudio traballou cos cineastas, escritores e figuras culturais máis cotizados do mundo para crear contido online visionario que resulta en vídeos, ilustracións, fotografías e textos.

En 2022, Nick Knight lanzou o proxecto de moda dixital ikon-1 cunha colección de NFTs que consiste en representacións dixitais fotorrealistas da polifacética creativa Jazzelle.

Knight vive coa súa esposa en Londres. Foi homenaxeado coa OBE en 2010 polos seus servizos ás artes. É profesor honorario na University of the Arts de Londres e foi recoñecido cun Doutoramento Honoris Causa pola mesma universidade. En 2022 Knight foi galardoado co Premio Master of Photography por Photo London.